ပန်းတစ်ပွင့်တောင်ဗုဒ္ဓသာသနာပြုတက္ကသိုလ်ကိုယ်စားလှယ်အဖွဲ့သည် ယနေ့နံနက်ပိုင်းတွင် ဗီယက်နမ်နိုင်ငံ၊ ဟိုချီမင်းမြို့မှ လေကြောင်းခရီးဖြင့် ထွက်ခွာလာခဲ့ပြီး ဒေသစံတော်ချိန် နေ့လယ် ၁:၃၀ အချိန်တွင်ကမ္ဘောဒီးယားနိုင်ငံ၊ ဖနွမ်းပင်မြို့ သို့ရောက်ရှိကြရာ ကမ္ဘောဒီးယားနိုင်ငံဆိုင်ရာ မြန်မာသံအမတ်ကြီးဦးမြင့်စိုးနှင့်မြန်မာသံရုံးမှတာဝန်ရှိသူများ၊ လာအိုနိုင်ငံဆိုင်ရာ မြန်မာနိုင်ငံ စစ်သံရုံးမှ စစ်သံမှူး ဗိုလ်မှူးချုပ်ဝင်းကိုနှင့် စစ်သံရုံးမှတာဝန်ရှိသူများက ကြိုဆိုနှုတ်ဆက်ကြ ပါသည်။
ညနေပိုင်းတွင် တက္ကသိုလ်ကိုယ်စားလှယ်အဖွဲ့သည် မြန်မာသံအမတ်ဦးမြင့်စိုး၊ စစ်သံမှူး ဗိုလ်မှူးချုပ်ဝင်းကိုနှင့် တာဝန်ရှိသူများလိုက်ပါလျက် ဖနွမ်းပင်မြို့ရှိ Pannasastra University သို့ရောက်ရှိကြရာ တက္ကသိုလ်ကောင်စီ ဥက္ကဋ္ဌ နှင့်တာဝန်ရှိသူများက ကြိုဆိုနှုတ်ဆက်ကာ တက္ကသိုလ်နှစ်ခုအကြား အပြန်အလှန်ချိတ်ဆက်ဆိုင်ရွက်နိုင်ရေးအတွက် တွေ့ဆုံ ဆွေးနွေးပြီး MOU လက်မှတ်ရေးထိုးကြကာလက်ဆောင်ပစ္စည်းများအပြန်အလှန်ပေးအပ်ကြပါသည်။
ထို့နောက် တက္ကသိုလ်ဘွဲ့နှင်းသဘင်ခန်းမတွင် ကျင်းပသော ဘွဲ့နှင်းသဘင်အခန်းအနားကိုတက်ရောက်ခဲ့ကြပါသည်။ ထိုမှတစ်ဆင့် Preah Sihanoukraja Buddhist University သို့ဆက်လက်ထွက်ခွာလာခဲ့ရာ ပါမောက္ခချုပ်ဆရာတော်နှင့် တာဝန်ရှိသူများက ကြိုဆိုနှုတ်ဆက်ကာ တက္ကသိုလ်နှစ်ခုအကြား အပြန်အလှန်ချိတ်ဆက်ဆိုင်ရွက်နိုင်ရေးအတွက် တွေ့ဆုံ နိုင်ရေးအတွက် တွေ့ဆုံဆွေးနွေးပြီး MOU လက်မှတ်ရေးထိုးကြကာ လက်ဆောင်ပစ္စည်းများ အပြန်အလှန်ပေးအပ်ကြ  ပါသည်။